Illum, it-8 ta' Mejju 2025, il-Kardinal Robert Prevost sar l-ewwel Awgostinjan li qatt sar Papa.

L-Ordni Awgostinjana, mwaqqfa fl-1244 AD, kellha tlettax-il membru fl-istorja tagħha li ġew imlaħħqa Kardinali — erbatax jekk tinkludi lil José Luis Lacunza Maestrojuán, tal-Ordni tal-Agostinjani Rikoletti (ordni ekkleżżjastiku li ħa l-indipendenza tiegħu mill-Ordni Awgostinjana fl-1612), li kien ġie pproklamat Kardinal fl-14 ta' Frar 2015, mill-Papa Franġisku.

Robert Prevost kien ġie pproklamat Kardinal fit-30 ta' Septembru 2023, mill-Papa Franġisku, fl-età ta' 68-il sena. Interessanti li l-aħħar Awgostinjan li kien ġie pproklamat Kardinal qablu (apparti mill-Kardinal José Luis Lacunza Maestrojuán tal-Ordni tal-Agostinjani Rikoletti) kien propju l-Kardinal Malti Prospero Grech, li kien ġie pproklamat fit-18 ta' Frar 2012 mill-Papa Benedittu XVI, fl-età ta' 86-il sena, u b'hekk kien sar l-ewwel Agostinjan li ħa t-titolu ta' Kardinal fi 111-il sena. (Ara wkoll kitba relatata hawnhekk: zafoid.com/post/view/11890.)